kab judenge yeh dil ke tukde,
kab mitenge yeh jakhmon ke dhabbe,
kabse chal raha hoon yun gidte padte,
kab bharenge yeh rahon ke gaddhe.

kyown fir dil lagane ko uksaati ho jaise,
hashn kya hai, na jaanti ho.

khwaab dekhne ko israar karti ho kaise,
jab shab o roz, neend na aati ho.

jaanta hoon, bhar jayenge yeh zakhm waqt mein.
ilm hai, guzar jayegi ek umra kis tarah bhi,
parr batao zakhmo bhare dil ko,
is pal ke liye hi kaise tum sehlaati ho?

kya hoga kareeb koi kal mein,
kya hoga dil khush us pal mein,
kya kehti ho, yeh sach hoga,
ya faqt dil ko tum bhelaati ho?

Is dard ki koi dawa nahin,
gamjada hoon aur koi dua nahin.

jam gaya hai barf ki tarah,
khayaal tera jigar ke irdgird.
sunn sa hai dil,
muhabbat ki koi arzoo nahin.

ab khud se hi hoon, atraaf koi nahin,
ji raha hoon, shaamil koi aur wajah nahin.

Dard itna badh gaya ki,
shayari ab likhi nahin jati.
angaare abhi garam hain aur
bhavnaon ko aandhi di nahin jati.

Darte hain, likhe kya ki,
kabr aise hi kuredi nahin jati.
dafn hai kai gam aise aur
jinki saansein ab talak nahin jati.

Bhaavnaon mein itna kas gaya,
ki dum hi ghutne laga.

Mann ke talaab main aisa bhanvar chala,
Iklauta baandh bhi tootata raha.

Ichaon ka boz itna badta gaya,
sapno ka mahal bhi dahane laga.

Riste ka dhaaga is tarah khinchta gaya.
ki ek vaar mein hi chatak gaya.

aur kissi kamzori ki gunjaayish na rahi,
jab paavan hridaya hi bhatak gaya.

char pal hain jeevan ke, fir bhi
sehta hai dard insaan pal pal kyown?

kal shaam ko theek tha,
aaj fir dukhi hai man itna kyown?

rishton ka yeh mayajal.
fas gaya aakhir itna gehra kyown?

aata hai akela aadmi, jaata hai akela.,
akelepan se darr gaya fir kyown?

Jis mod pe aa gaye hain,
kayi surkh rahen nazar aati hain.
Manzilen door talak jaati hain,
aur kadam thamte nazar aate hain.
Peeche jin rahon mein jo sukoon chod aaye hain,
mud mud kar use dekhne ruk jate hain.
bemann se kal ki taraf dekhte hain,
bhaari kadmon se fir chal padte hain.
Apno ki jo pal pal paribhasha badal rahe hain,
isi beech kuch apno ko paraya kar chale jate hain.
Tadapte hain, chatpatate hain.
Kuch bandahanon ko pakadne ke liye,
kuch bandhanon ki bali chadate hain.
Na jeete hain na marte hain.
Disha heen se kissi thor bade chale jate hain.
-
Jis mod pe aa gaye hain,
kayi surkh rahen nazar aati hain.